بسم الله الرحمن الرحيم

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين

الحقيقة ان هذي اول مشاركة لي بهذا المنتدى
وأتمنى من الله الاستفادة وجزاكم الله كل خير

باختصار شديد اني حلمت حلم منذ ما يقارب الاسبوع وهو :
حلمت إني في مكان أشبه بالمسجد ، بس ما هو مسجد ، وكان فيه ناس وايد وايد وكلهم حريم ، وكنت أسمع سوالف بس ما أتذكر شنهي هالسوالف يعني ما كنت أثبت على سوالفهم، وبعدين جات وحدة وكلمتني وأظن انها خالتي ، وخالتي هذي إمرأة ملتزمة وتقريبا ً مطوعة وسالتني : تبين تعرفين وشلون يفكر الشيطان ؟ أو يعني نعبد الشيطان ؟ - بمعنى هالشيء تقريبياً - وإن الشيطان بيسطير علينا فترة عشان نعرف وشلون يفكر وبس ، وبعدين على طول بنتخلص منه ، وقالت لي لا تخافين ما بنكفر بس بنصير مسيح .
وحسيت انها أقنعتني بهالشيء وبعدين سالتها : انزين بعدين نقدر نرجع مسلمين ؟ قالت لي أكيد هي بس تجربة وبعدين فيه طريقة نرجع مسلمين بعدها ، وأقنعتني بهالشيء وانا والله العظيم ما أدري وشلون إقتنعت فيه؟
وبعدين فيه وحدة جاتني وحطت على راسي شوية طين ، وقالت لي انتظري شوي ، وانتظرت وبعدين حسيت راسي ثقيل ، وجسمي مو ملكي ، مثل اللي فيه احد يسيطر عليه ، وحسيت انه فيه احد يوجهني عشان أحط راسي تحت طاولة ،أو مدري تحت شي يشبه للطاولة ، وبجذي صرنا نعرف وش يفكر الشيطان ، وانا ما عرفت أصلا ً شنو يفكر ولا العبرة من اللي صار !
وبعدين على طول صرت أدور على خالتي أو المرأة اللي أقنعتني أني أحط هالطين ، ومثل اللي كنت شوي وبصيح ، تخنقني العبرة وانا اردد : لا مابي اصير كافرة ، وجات وحدة وقالت لي لا تخافين وإطلعي الطابق الثاني وبتلقين فيه ناس وايد مسوين مثلك ، وقاعدين ينتظرون يردون مسلمين مرة ثانية ، ورحت.. وشفت حريم وايد وشفت حريم أعرفهم يصيرون لي ، وشفت بنات بعد يقربون لي علاقتي معاهم في عادية جدا ً في الحياة الطبيعية ، بس هم في الحلم لما شافوني كانوا يرحبون فيني بقوة وأصروا علي َّ وخلوني أقعد معاهم ، وقعدت معاهم وكنا قاعدين ننتظر بالدور ، وبعدين طلعنا انا والبنات والمرأة اللي تصير لي، وركبنا بيكأب ، والبنات كانوا ينادوني عشان اقعد معاهم ورى ، وطلعنا ورحنا شقة انا وهالبنات، وفصخت عبايتي بهالشقة ، وكنت لابسة لبس مو محتشم ، يعني لبس عاري ، واستأذنت منهم عشان أروح الحمام أقضي حاجة – والكل بكرامة – وما كنت أدري إنهم وراي ، وكانوا يبون يشوفوني بدون ثياب وانا مثل اللي كنت ابي اتغطى عشان ما يشوفوني وبعدين انقطع الحلم وصحيت من النوم.

ولما صحيت اتصلت على احد من الشيوخ اللي نعرفهم وقلت الحلم وقال لي هذا تحذير
من الله سبحانه وتعالى عشان تتوبين من المعاصي وان فيه معاصي انا اسويها ولازم أتوب منها
ولازم اتخير صحبة صالحة ترشدني للخير وبس !

بس الحقيقة ان ما عندي معاصي كبيرة اتوب عليها ولا أدري اصلاً شنهي هالمعاصي اللي بتوب منها
وياليت ألقى تفسير للحلم جزاكم الله كل خير ونفع بكم الناس


سارة